Sábado 30/04/22

 Moi boas: última entrada do blogue.

Xa estamos en Madrid cando escribimos estas liñas.

Hoxe tocan outras fotos e outros momentos da viaxe, comezando por esas horiñas nocturnas no aeroporto Charles de Gaulle, durmindo e bromeando.

Foi un pracer viaxar con estas rapazas e rapaces.

Moitas grazas por seguirnos, moitas grazas aos nosos estudantes do proxecto FOCUS -unha iniciativa Erasmus+- polo seu traballo, entusiasmo e alegría.

Grazas e ata sempre.

Haberá máis proxectos Erasmus no noso colexio? Seguro que si.

Venres 29/04/22

Día de despedidas en Champagné e Le Mans.

Pero antes puidemos disfrutar das presentacións dos talleres levados a cabo o xoves, ademais de intentar resolver o Escape Game preparado nun deles.

Despois, visita a Le Mans (unha cidade extraordinaria), as despedidas e os choros, e cinco horas pateando París.

A media noite chegamos ao aeroporto Charles De Gaulle, onde saberemos que significa durmir nun aeroporto.

Mañán volvemos a Santiago cheos de agradecemento por ter a oportunidade de vivir unha semana tan fermosa.

Grazas por seguirnos.

Xoves 28/04/22

 Saúdos dende Francia de novo.

Hoxe foi día de talleres: despois de tres días con múltiples actividades, hoxe e mañán toca plasmar todo o aprendido.

Esta mañán tivemos un encontro con Marietta Karamanli, unha deputada da Asemblea Nacional Francesa. Foi interesante ver o punto de vista dunha mestra que se dedica á política institucional dende hai anos. Falamos e debatimos sobre ecoloxía, ideoloxía, problemas de mobilidade... Faltaron temas importantes que marcan as vidas das persoas -coma o traballo ou a vivenda-, pero foi moi interesante e emocionante escoitar a mozas, mozos e adultos debatir sobre política.

A continuación, desenvolvéronse os distintos talleres:

- Debate sobre problemas que afectan ao mundo urbano.

- Escape game (con preguntas e retos a resolver con axuda do aprendido os días

anteriores).

- Redacción dunha carta para enviar a distintas institucións políticas. Nela, a

mocidade do proxecto FOCUS formula propostas para mellorar as vidas das persoas

que viven nas cidades.

- Reportaxe fotográfica acerca da semana en Francia e todas as actividades

desenvolvidas.

Ao mesmo tempo que traballamos, en distintos turnos, tivemos a gran oportunidade de recibir unha clase de iniciación ao parkour, un deporte urbano que naceu en Francia nos anos 90, cando un militar do exército francés, xa retirado, decidiu facer na cidade moitos exercicios que aprendera no exército nos exercicios de supervivencia que realizaban, pero non con fins militares, por suposto.

O final do día estivo marcado por unha cea na que, segundo relatan as nosas rapazas e rapaces do proxecto, houbo un ambiente estupendo.

Como siempre deixamos algunhas instantáneas da xornada.

Ata mañán, xa dende París.

Grazas por seguirnos.

Mércores 27/04/22

 Moi boas de novo: un día longo o de hoxe.

Estivemos en Nantes, capital da rexión do País do Loira e a cuarta cidade máis importante de Francia. E máis tarde visitamos St Nazaire, esa cidade que compite con Ferrol por conseguir contratos de construción de buques. En Nantes estivemos visitando LES MACHINES DE L ́ILLE, un espazo industrial no porto de Nantes que, unha vez levados os asteleiros a Saint Nazaire, quedou despoboado e destrozado. Anos despois, entrando no século XXI, comezou un proxecto de rehabilitación desta illa do río Loira, que se traduce en multitude de obras de arte e edificios de gran valor artístico, comezando polo Pazo de Xustiza (de Jean Novel) e continuando por distintos edificios da Universidade de Nantes. Foi fermoso ver o respecto e orgullo polo patrimonio industrial da cidade, e como se conseguiu transformar unha área deprimida da cidade nunha caracterizada pola súa vitalidade e brillantez.

Despois de comer de picnic, achegámonos a St Nazaire, unha cidade que ten a súa orixe moderna no século XIX pero que se fixo famosa no século XX porque foi unha das bases dos submarinos alemáns na II Guerra Mundial. Agradecemos moito a visita guiada á cidade e o tempo de esparcimento na praia.

Esperamos que estas imaxes que compartimos poidan darvos unha idea de todo o que disfrutamos hoxe.

Ata mañán e grazas por seguirnos

No