Xoves 28/04/22

 Saúdos dende Francia de novo.

Hoxe foi día de talleres: despois de tres días con múltiples actividades, hoxe e mañán toca plasmar todo o aprendido.

Esta mañán tivemos un encontro con Marietta Karamanli, unha deputada da Asemblea Nacional Francesa. Foi interesante ver o punto de vista dunha mestra que se dedica á política institucional dende hai anos. Falamos e debatimos sobre ecoloxía, ideoloxía, problemas de mobilidade... Faltaron temas importantes que marcan as vidas das persoas -coma o traballo ou a vivenda-, pero foi moi interesante e emocionante escoitar a mozas, mozos e adultos debatir sobre política.

A continuación, desenvolvéronse os distintos talleres:

- Debate sobre problemas que afectan ao mundo urbano.

- Escape game (con preguntas e retos a resolver con axuda do aprendido os días

anteriores).

- Redacción dunha carta para enviar a distintas institucións políticas. Nela, a

mocidade do proxecto FOCUS formula propostas para mellorar as vidas das persoas

que viven nas cidades.

- Reportaxe fotográfica acerca da semana en Francia e todas as actividades

desenvolvidas.

Ao mesmo tempo que traballamos, en distintos turnos, tivemos a gran oportunidade de recibir unha clase de iniciación ao parkour, un deporte urbano que naceu en Francia nos anos 90, cando un militar do exército francés, xa retirado, decidiu facer na cidade moitos exercicios que aprendera no exército nos exercicios de supervivencia que realizaban, pero non con fins militares, por suposto.

O final do día estivo marcado por unha cea na que, segundo relatan as nosas rapazas e rapaces do proxecto, houbo un ambiente estupendo.

Como siempre deixamos algunhas instantáneas da xornada.

Ata mañán, xa dende París.

Grazas por seguirnos.

Mércores 27/04/22

 Moi boas de novo: un día longo o de hoxe.

Estivemos en Nantes, capital da rexión do País do Loira e a cuarta cidade máis importante de Francia. E máis tarde visitamos St Nazaire, esa cidade que compite con Ferrol por conseguir contratos de construción de buques. En Nantes estivemos visitando LES MACHINES DE L ́ILLE, un espazo industrial no porto de Nantes que, unha vez levados os asteleiros a Saint Nazaire, quedou despoboado e destrozado. Anos despois, entrando no século XXI, comezou un proxecto de rehabilitación desta illa do río Loira, que se traduce en multitude de obras de arte e edificios de gran valor artístico, comezando polo Pazo de Xustiza (de Jean Novel) e continuando por distintos edificios da Universidade de Nantes. Foi fermoso ver o respecto e orgullo polo patrimonio industrial da cidade, e como se conseguiu transformar unha área deprimida da cidade nunha caracterizada pola súa vitalidade e brillantez.

Despois de comer de picnic, achegámonos a St Nazaire, unha cidade que ten a súa orixe moderna no século XIX pero que se fixo famosa no século XX porque foi unha das bases dos submarinos alemáns na II Guerra Mundial. Agradecemos moito a visita guiada á cidade e o tempo de esparcimento na praia.

Esperamos que estas imaxes que compartimos poidan darvos unha idea de todo o que disfrutamos hoxe.

Ata mañán e grazas por seguirnos

No

Martes 26/04/22

Ola de novo: hoxe martes estivemos en Le Mans.

Primeiramente visitamos dúas plantas de tratamento de residuos: unha incineradora e unha planta de reciclaxe de plástico. Alí coñecemos o seu funcionamento e toda a complexidade que se esconde na xestión dos residuos nunha área xeográfica dunhas 200 mil persoas. Só un dato: reciclan cada día 21 toneladas de residuos xerados polo consumo da sociedade. Máis tarde disfrutamos das obras feitas no FESTIVAL PLEIN CHAMP, o estupendo festival internacional de arte na rúa do que nos falaron onte luns. Ademais de ver as obras, tivemos tempo para descansar, comer de picnic, xogar ao baloncesto e o fútbol, descansar, pasear pola beira do río...

Mañán toca Nantes e St Nazaire.

Esperamos que vos gusten as fotos que eliximos do día.

Grazas por serguirnos.

Luns 25/04/22

Día intenso hoxe en Champagné.

Comezamos ás 8:30 horas e, despois das presentacións de rigor, dedicamos unha hora a xogos que nos axudaron a coñecernos mellor, rir un pouco e romper o xeo nestas primeiras horas xuntos.

Despois, os estudantes polacos, franceses e españois visitamos unha escola de primaria na que cada escola participante no proxecto explicou en 10 minutos como era o país e escola da que viñan. Foi unha experiencia ben bonita e sorprendeunos o moito que preguntaban os cativos sobre Galicia e a nosa escola.

Despois da comida (ás 12 da mañán) e dun descanso, tivemos a oportunidade de coñecer a representantes de distintas ONGs da área na que estamos: coñecemos o traballo de persoas que loitan en favor da reciclaxe e a concienciación en materia ecolóxica; tamén unha asociación que promove a mobilidade en bicicleta; e unha última asociación que nos evidenciou que as persoas con mobilidade reducida seguen sendo, desgrazadamente, cidadáns de segunda.

Para rematar, disfrutamos a visita dun dos impulsores do PLEIN CHAMP FESTIVAL, un espectacular encontro de arte na rúa. Vimos algunhas das obras e coñecemos a filosofía deste acontecemento.

Mañán poderemos ver as obras creadas en xullo pasado, así que xa vos contaremos.

E, para rematar o día, fomos practicar LASER GAMES: vestidos como guerreiros do espazo, pasamos tres horas estupendas. Rematamos a xornada ás 22:30 horas moi contentos.

Deixamos unhas imanes do día:

Grazas por seguirnos.

.

- '

24/4/22 Viaxe a Francia

 Ola, moi boas. Que gusto escribir estas liñas que, hai só uns meses, pensabamos non poder escribir nunca. Foi difícil pero aquí estamos. Ilusionados e ilusionadas… Dispostas e dispostos a dar o mellor de nós mesmos para que este encontro internacional Erasmus sexa inolvidable. Hoxe foi o momento da viaxe; primeiro a París e despois a Le Mans, onde os nosos rapaces e rapazas do proxecto FOCUS xa descansan nas súas familias de “adopción” e onde se canta a Marsellesa nas rúas tras coñecerse os resultados electorais da segunda ronda das presidenciais francesas. Mañán comezaremos a estudar e reflexionar sobre a cidadanía e a democracia, que é o tema que marca o último semestre do noso proxecto FOCUS, unha iniciativa Erasmus+. Aquí vos deixamos unhas cantas fotos deste domingo. Grazas por seguirnos.

6 Marzo, último día

Moi boas: mañán xa volta o grupo Erasmus+ despois desta excitante e esgotadora semana visitando Varsovia, Nowa Huta e Cracovia.

Moitas experiencias, moitas visitas a lugares inolvidables, nomes de persoas que nos quedan na cabeza, abrazos entre rapaces e rapazas de 12 a 16 anos que compartiron moito máis que visitas culturais.

Hoxe rematamos sinxelamente, amosando os resultados dos talleres realizados, resultados que tiveron que presentar ante todo o grupo (en inglés, por suposto). Foi moi interesante escoitalos, velos comprometerse e implicarse no reto que tiñan que cumprir.

Ademais, tamén queremos amosarvos un pouquiño (moi pouquiño) das actividades que fixeron cos seus amigos e "familias polacas" durante estes días.

Ata mañán e grazas por seguirnos.

Foi un pracer achegarvos as experiencias que todas as persoas do proxecto FOCUS temos vivido estes días.
Deixamos algunhas imaxes da despedida.