1-2 Marzo. Viaxe e primeiro día

Ola que tal? Nós levamos 24 horas en Varsovia e xa nos estamos a namorar.

Despois dunha viaxe tranquila e do encontro coas familias polacas, hoxe foi o primero día de proxecto.
E foi intenso:
- Comezamos coñecéndonos na escola cuns xogos.

- Despois saímos cara ZODIAK, o organismo do Concello de Varsovia encargado da planificación urbanística. Alí explicáronnos e coñecemos a historia e o crecemento da cidade dende o século XIII ata a actualidade.

Finalmente, subimos ao cume do Palacio de Cultura, un edificio de 137 metros de altura construido por orde de Stalin e que suscita discusións entre a poboación local (é un sinal do oprobio soviético ou un edificio moi interesante que achega a cultura á cidadanía de Varsovia? Ou quizais as dúas cousas?).

- A continuación visitamos o río Vístula e coñecemos os intentos que se están a levar a cabo para recuperar as aves mariñas que tiñan abandoado o río ao seu paso por Varsovia. Foi sorprendente ver fermosos paxaros (e as súas crías) coa axuda dos prismáticos que tan amablemente nos deixaron.

- E finalmente a extraordinaria visita a Jazdow (jazdow.pl), unha comunidade autoxestionada no mesmo centro de Varsovia. 25 casas nas que ONGs e familias intentan lanzar adiante un centro cultural dende 1945. Teñen escola infantil, teñen un horto conunitario, organizan concertos e conferencias, tamén desenvolven talleres para desempregados e mozos e mozas de Varsovia... Todo feito con moito traballo e ningunha subvención, e cun ideario clarísimo, no que o ecoloxismo, o consumo responsable e o espírito comunitario marcan a súa acción. Que marabilla de proxecto!

Día longo, é certo, pero día moi nutritivo para todas as persoas que compartimos proxecto.

Ata mañán e grazas por seguirnos.

Bos días: hoxe remata a nosa aventura en Alemaña.

Foi realmente interesante e xa só queda coller o avión cara Barcelona primeiro e despois cara A Coruña.

De despedida, só amosarvos unhas poucas imaxes que nos encantan.

E xa vedes que non falamos do frío, PERO QUE FRÍO!!

Foi un pracer.

E grazas por seguirnos.

21 e 22 de novembro:

Moi boas de novo:

Onte e hoxe, dende as oito da mañán e ata a unha da tarde, todo o grupos Erasmus+ traballou arreo.

Os nosos rapaces e rapazas, en grupos internacionais novamente, protagonizaron catro talleres sobre distintos aspectos estudados estes días pasados:

• Lixo: este grupo estudiou e experimentou con distintos tipos de residuos e fixeron propostas para mellorar a xestión e tratamento do lixo na cidade de Bad Nenndorf. Hoxe presentaron os seus resultados, plasmados nalgúns dos posters que vos amosamos.
• Transporte: utilizando os datos obtidos durante estes días e traballando con distintas persoas, os nosos rapaces e rapazas investigaron a incidencia do uso dos coches sobre o planeta, achegáronse aos distintos medios de transporte e ao seu efecto sobre a natureza, e aportaron catro alternativas ecolóxicas ao uso do coche. Hoxe presentaron, dixitalmente, os seus traballos e conclusións.
• Expansión urbana: este grupo, utilizando mapas e fotos aéreas da cidade de Bad Nenndorf, investigaron como se foi ampliando o espazo urbano dende 1951 ata a actualidade, contabilizando o número de novas vivendas, o aumento da área urbana, a perda de superficie agraria, os problemas para a poboación dese crecemento... Finalmente, hoxe presentaron as súas conclusións e aventuraron como será Bad Nenndorf en 1960 se medra dunha maneira equilibrada e respectuosa co medio ambiente.
• Insectageddon: neste grupo a investigación xirou arredor da importancia dos insectos na natureza, centrando a atención fundamentalmente nas abellas. Ademais, dentro do taller elaboraron varios hoteis para insectos que levamos con nós para Santiago. Hoxe expuxeron as súas conclusións e amosaron as súas fermosas vivendas para insectos.

Pero non todo foi traballar e onte pola tarde puidemos volver a Hanover, onde fixemos un pequeno percorrido por algúns dos lugares máis destacados da cidade. Despois, 80 minutos de tempo libre que os nosos rapaces e rapazas disfrutaron un montón.

Xa para rematar, hoxe, ao rematar as presentacións, a alegría contaminou o ambiente dunha maneira estupenda cando nos sacamos a foto final de grupo. Saltaron, riron, gritaron... e foi fermoso velos e acompañalos.

Esta tarde irán á bolera (algunha foto veredes na entrada de mañán) e pasarán as súas últimas horas coas súas familias en Alemaña.

Mañán pola mañá voamos cara España.

Grazas por seguirnos.

Boas noites: de novo escribimos para contar un pouco máis da experiencia estupenda que están a vivir os nosos rapaces e rapazas do proxecto FOCUS, unha iniciativa Erasmus+.
Hoxe foi o día de AUTOSTADT, a cidade do automóbil, a xoia de Volkswagen na cidade de Wolfsburgo.
Seguindo o noso estilo de traballo en grupos internacionais e utilizando o inglés como lingua vehicular, o noso alumnado estivo visitando o museo que ten adicado a multinacional alemana a cambio climático e novas enerxías.
Foi interesante calcular, a través de distintas actividades e paneis interactivos, cal é a nosa pegada ecolóxica, descubrir que relación ten a nosa vida coa dos campesiños que cultivan cacao ou café en plantacións africanas ou sudamericanas... E tamén foi fermoso coñecer formas concretas de reducir a nosa pegada ecolóxica, entender que hai outras formas de organizar a economía, a sociedade, o noso consumo... que potencien o coidado da natureza e das persoas que a habitan, empezando por nós mesmos e as persoas que producen a nosa comida e bens de consumo.
Ademais desta visita e dun pouco (moi pouco) de tempo libre para comer ou visitar outras zonas deste enorme complexo, fixemos un pequeno tour por distintas instalacións do museo, apreciando a evolución do automóbil dende o modelo T de Ford ata outros automóbiles, de nova xeración e eléctricos. Ademais, algunhas e algún de nós atendemos a unha explicación acerca da evolución das estradas dende Roma ata a actualidade.
Esto é o que fixemos, pero o que se ve é aínda mellor: as nosas rapazas e rapaces rindo cos compañeiros e compañeiras polacas, francesas, alemanas; os debates para resolver as preguntas que lles presentamos, as súas clases de polaco ou alemán...
Mañán é un día importante porque comezamos a reflexionar sobre as actividades que fomos facendo estes días. É tempo de crear e formular propostas.

Grazas por seguirnos.

Boas noites: día do máis interesante o de hoxe en Hanover.
Ás oito da mañán collemos un tren que nos levou ata esta interesante cidade, que foi destruida polos bombardeos aliados en 1945 e refeita case que completamente.
Alí fixemos tres actividades:

• a visita ao Museo da Cidade, onde vimos unha exposición fotográfica sobre como foi medrando a cidade dende 1945 ata o presente. Foi emocionante ver imaxes de familias que, procedentes de España, axudaron a producir o "milagro económico alemán" dos sesenta. Vivindo en barracóns contribuíron a crear a terceira potencia industrial mundial.
• un tour por Hanover para reflexionar sobre o cambio climático a través dos medios de transporte, a comida que compramos e a súa procedencia, o impacto do noso estilo de vida...
• coñecemos "Transition Hanover", unha organización que se adica á creación e fomento de hortas urbanas nas que se practica agricultura ecolóxica e un consumo responsable. Explicounos todo o señor García, co que nos fotografiamos, un fillo dun deses migrantes españois que marcharon a Alemaña nos anos 60 do século XX.

E mañán máis: a cidade do automóbil en Wolfsburgo (a xoia de Volkswagen). Que pasada!

Grazas por seguirnos.

Boas noites: hoxe foi un día para coñecernos e coñecer a vila de Bad Nenndorf.

Comezaron os nosos rapaces e rapazas ás 8 da mañán, asistindo a un par de clases (en inglés ou en alemán) para imaxinar e palpar como é iso dunha aula nesta escola, como se relacionan os profesores e profesoras co alumnado,…

Despois disto, aprenderon uns cuantos nomes dos seus colegas alemáns, franceses e polacos a través de distintos xogos de coñecemento nos que compartían cales eran as súas aficións ou comidas preferidas, o gusto por algún instrumento musical ou se tiñan a mesma mascota…

Despois dun pequeno descanso, chegou unha actividade para coñecer a realidade de Bad Nenndorf, prestando especial atención a diferentes aspectos relacionados coa ecoloxía: transporte, emisións de CO2, pegada ecolóxica… Fixeron esta actividade en grupos internacionais, compartindo traballo con sete rapaces e rapazas de catro nacionalidades diferentes.

Pola tarde tempo para estar coas súas familias: sabemos que algúns estiveron patinando sobre xeo e outros nun local de “escape room”.

Mañán toca Hanover, un lugar onde esperamos aprender moitas cousas e medrar en amistade coas rapazas e rapaces do proxecto Erasmus+ que compartimos.

Deixámosvos unhas fotos das primeiras actividades.

Grazas por seguirnos.

Boas noites: aquí chega a nosa primeira entrada do blog que vos achegará as vivencias do grupo Erasmus+ do noso colexio a vindeira semana.

Partimos ben cedo de Santiago e, despois dunha breve estancia no aeroporto de Barcelona, onde aproveitamos para felicitar aos xogadores e adestradores do Obradoiro pola súa victoria ao Manresa, chegamos a Hanover como estaba previsto.

Xa en Hanover, todas as familias alemanas que acollen ás nosas rapazas e rapaces do proxecto FOCUS recibiron con alegría a nosa chegada.

A tarde foi de comezar a coñecerse e mañá comezamos xa ás 8 da mañán no Gymnasium Bad Nenndorf, a nosa escola socia aquí.

Será un día para empezar a coñecernos e visitar a cidade na que estamos, unha cidade balneario cunha gran tradición en augas termais e un parque que podemos definir como distinto.

Grazas por seguirnos.